最近一句「有咁耐风流，有咁耐折堕」，搞到满城风雨。的确，若然在感情方面风流，就真系搞到你同伴侣有排烦！而在相学来睇，确系有「风流相」
存在，有些风流相更连带埋「折堕相」添！究竟点至谓之风流相，又点样去补救？就要听听玄学家的指点啦！
一眼睇出风流相
不论男女，林炳南师傅话要睇一个人系咪有副风流相，就要从双眼着手：如果年纪唔算大，只有廿几、三十余岁， 唔笑的时候已见眼尾有超过一条鱼尾纹，而笑时更见鱼尾纹又多又深的话，就代表呢个人生性风流；至于「福德宫」（眉毛对上位置）生得饱满，亦都系风流的象征，若年纪轻轻有此长相，亦有可能引来唔少风流事。
此外，若一个人合上嘴，嘴角明显向上戚，好似笑紧咁，这就叫做「口角春风」，代表呢个人愈老愈风流，到五、六十岁依然未定性。
有以上长相者，就多数系风流成性，她的伴侣真系有排惊！
风流过后折堕时
有以上长相的朋友，亦不用「沾沾自喜」，其实对感情事咁唔认真，又点会过得开心？林师傅话，阁下纵使有上述的风流相，如果亦有埋以下相格的话，就容易衰在感情纠纷里面，令你伤心之同时，分分钟仲有破财，甚至碰上血光之灾的可能：
1）眼有鱼尾纹但眼尾向下垂，就代表呢个人风流得
却冇运行，成日卷入桃色纠纷。
2）「福德宫」饱满但有墨、有痣的话，情形就如上述一样，令你麻烦多多。
3）口角带春风，但系「地角不朝」（即下巴唔够兜，生得扁平），再加上下巴
从正面看来呈尖削的话，呢个人风流得很，他的整体运程都会大受影响。
「有咁耐风流，有咁耐折堕」，真系唔到你唔信！
爱情重伤睇面相
冇风流相、冇折堕相，感情上亦未必一定安稳度过。林师傅话如面相有以下特征的朋友，对感情事都要加倍小心：
眼：一般人多数只有单眼皮或双眼皮，但如果有三眼皮或四眼皮，就代表呢个人容易卷入三角恋、多角恋等，真系有排烦。此外，如有人有「眼积泪」（即眼睛好似有泪水积聚而冇流出来咁），就代表佢成日挂住逝去的恋情，搞到精神紧张，想有一段新恋情都唔易啰！
嘴：人的上下唇代表男女结合，如果有人个嘴唔能够完全合埋，就代表男女常有分隔的情况出现。
鼻：若山根（即双眼中间对落少少的位置）连鼻梁过于瘦削呈尖形，就好似一把刀咁，容易伤害男女感情。
消除烦恼有方法
「哎呀！我男朋友原来有副风流相，点算？」解决以上问题，唔一定要整容咁大阵仗。林师傅而家就教大家一些方便的解决办法：
1）有鱼尾纹者，可以笑容唔好咁夸张，以免暴露缺点，亦都可以戴番副有深色框的眼镜来遮住他。
2）「福德宫」有痣，最好脱了它。
3）若男性下巴又平又尖，可以在唇上留须。睇面相系由上至下的，如果唇上有须，可以阻挡所有风流、折堕的东西传至下巴。
4）今年西北位为生气位， 屋企呢个位置放些会摆动的公仔、装饰等，就可以有美满的感情。
5）坑渠、地陷处容易积水，即所谓「桃花水」，若住处同呢 地方距离相近，易犯桃花劫，所以有可能的话可以搬屋，甚至搬到近郊处，令人心旷神怡，免去感情烦恼事。
